Kürdəmirdə dəhşətli qəza | Mikroavtobus geriyə hərəkət zamanı piyadanı vurdu

Kürdəmirdə piyadanın ölümü ilə nəticələnən ağır yol-nəqliyyat hadisəsi baş verib.

Hadisə rayonun Bakı prospektində, rayon avtovağzalının qarşısında baş verib.

Belə ki, rayon sakini, 35 yaşlı sürücü İsmayılov Asif Ziyad oğlu özünə məxsus “Ford” markalı mikroavtobusla arxa tərəfə hərəkətdə olarkən rayon sakini, 66 yaşlı İsrafilov Rasim Ağa oğlunu vurub.

Ağır bədən xəsarətləri alan yaralı ətrafda xidmət aparan polis əməkdaşları tərəfindən dərhal Kürdəmir Rayon Mərkəzi Xəstəxanasına çatdırılsa da, onun həyatını xilas etmək mümkün olmayıb. Yaralı xəstəxanada dünyasını dəyişib.

Qeyd edək ki, Rasim İsrafilov uzun illərdir Kürdəmir rayon avtovağzalının müdiri vəzifəsində çalışırdı. Onun meyiti müayinə olunması üçün Səhiyyə Nazirliyinin Məhkəmə Tibbi-Ekspertizası və Patoloji Anatomiya Birliyinin Kürdəmir rayon şöbəsinə aparılıb. Hazırda faktla bağlı Kürdəmir Rayon Polis Şöbəsində araşdırma aparılır.