Kürdəmirin sabiq icra başçısı ilə bağlı yeni qərar: Ceyhun Cəfərovun müraciətinə baxıldı

Kürdəmir Rayon İcra Hakimiyyətinin sabiq başçısı Ceyhun Cəfərovun cəzaçəkmə növünün dəyişdirilməsi ilə bağlı müraciətinə baxılıb.

Nizami Rayon Məhkəməsində onun müraciəti təmin edilib. Belə ki, Ceyhun Cəfərovun cəza çəkdiyi ümumi rejimli cəzaçəkmə müəssisəsindən məntəqə tipli cəzaçəkmə müəssisəsinə köçürülməsi ilə bağlı qərar qəbul edilib.

Qeyd edək ki, sabiq icra başçısı və Kürdəmir rayonunun digər vəzifəli şəxsləri Baş Prokuror yanında Korrupsiyaya Qarşı Mübarizə Baş İdarəsi tərəfindən 2020-ci ilin avqust ayında keçirilən əməliyyatla həbs olunub.

Lənkəran Ağır Cinayətlər Məhkəməsinin hökmü ilə sabiq icra başçısı Ceyhun Cəfərov 8 il 6 ay müddətinə azadlıqdan məhrum edilib. Şirvan Apellyasiya Məhkəməsi Ceyhun Cəfərovun cəzasını 6 ilə endirib. Ali Məhkəmə isə Ceyhun Cəfərovun cəzasını azaldaraq üzərində 4 il 6 ay azadlıqdan məhrumetmə cəzası saxlayıb.