Lənkəranda 45 yaşlı qadın yanıq xəsarətləri aldı

Lənkəranın Kərgəlan kənd sakini 45 yaşlı Zəhra Hüseynova təmizlik işləri görərkən ehtiyatsız davrandığına görə yanıb.

Yaxınlarının sözlərinə görə, zərərçəkən həyətdəki təmizlik işlərindən sonra küçədə yığılan zibil tullantılarını yandırmaq istəyib. Tullantıların yanmadığını görən qadın benzindən istifadə edib. Bu zaman ani ehtiyatsızlıq qadının özünün yanmasına səbəb olub.

Z.Hüseynova qonşuların köməyi ilə təcili tibbi yardım maşınında Lənkəran Rayon Mərkəzi Xəstəxanasına çatdırılıb.

Xəstəxanadan bildirilib ki, Z.Hüseynova bədəninin ümumi səthinin 2-3-cü dərəcəli termiki yanığı diaqnozu ilə TƏBİB-in tabeliyində fəaliyyət göstərən Lənkəran Rayon Mərkəzi Xəstəxanasının təcili yardım şöbəsinə daxil olub. Xəstəyə zəruri tibbi xidmətlər göstərilib, dərhal reanimasiya şöbəsinə köçürülüb, vəziyyəti ağır qiymətləndirilir.

Qeyd edək ki, vəziyyəti ağır olan Zəhra Hüseynova Bakı şəhərindəki klinikaların birinə göndərilib.