Liseydə şok hadisə: Şagirdin müəllimi güllələməsinin detalları | Hadisə şahidləri danışdı - Baku TV

Bakı şəhəri, Binəqədi rayonunda yerləşən “İdrak” liseyində silahlı insident baş verib.

İlkin məlumatlara əsasən, liseyin 10-cu sinif şagirdi riyaziyyat müəllimi Şəhla Kamilovaya odlu silahdan atəş açıb.

"Eşitdim, amma ağlıma gəlmədi silah səsi. Elə bildim hansısa sinifdə şkaf aşdı”, – deyə hadisə şahidi bildirib.

Şəhla Kamilova aldığı xəsarət nəticəsində Kliniki Tibbi Mərkəzə yerləşdirilib. Hazırda onun müalicəsi Cərrahiyyə şöbəsində davam etdirilir, vəziyyəti orta ağırdır.

Faktla bağlı Binəqədi Rayon Prokurorluğunda Azərbaycan Respublikasının Cinayət Məcəlləsinin müvafiq maddəsi ilə cinayət işi başlanaraq ibtidai istintaq aparılır. Hadisəni törətməkdə şübhəli bilinən şagird prokurorluq tərəfindən saxlanılıb.

Hazırda prokurorluq əməkdaşları hadisə yerinin baxışını keçirir, eləcə də hadisənin başvermə şəraiti və səbəblərinin dəqiqləşdirilməsi istiqamətində zəruri prosessual hərəkətləri icra edir.