Lökbatandakı yanğın barədə FHN-dən açıqlama | 40 texnika və helikopterlər cəlb olundu - Baku TV

Lökbatanda yanğın baş verən əraziyə Fövqəladə Hallar Nazirliyinin 190 nəfər şəxsi heyəti, 40-a yaxın texnikası və 2 helikopter cəlb edilib.

Bu barədə Fövqəladə Hallar Nazirliyi Dövlət Yanğından Mühafizə Xidmətinin rəis müavini polkovnik Taleh Babayev jurnalistlərə açıqlamasında deyib. Onun sözlərinə görə, yanğında xəsarət alan olmayıb.

T.Babayev bildirib ki, Qaradağ rayonu Lökbatan qəsəbəsində anbarda yanğın baş verməsi haqqında Fövqəladə Hallar Nazirliyinin 112 Qaynar xəttinə məlumat gələn kimi dərhal əraziyə Dövlət Yanğından Mühafizə Xidmətinin Xüsusi Riskli Xilasetmə Xidmətinin qüvvələri cəlb edilib, həmçinin Bakı Regional Mərkəzinin şəxsi heyəti hadisə yerinə yönləndirilib:

"Yanğının anbar ərazisində baş verməsi, hava şəraitinin küləkli olması nəzərə alınaraq yanğın yerinə əlavə qüvvələr cəlb olunub. Ümumilikdə 190 nəfər şəxsi heyət, 40-a yaxın müxtəlif təyinatlı yanğınsöndürmə texnikası cəlb olunub. Eləcə də 2 helikopter yanğının söndürülməsində iştirak edib.

Hazırda yanğının söndürülməsi işləri davam etdirilir. Yanğına bitişik olan digər anbar tam olaraq mühafizə edilib. Anbarın daxilində söndürülmə işləri əməkdaşlar tərəfindən həyata keçirilir".