Magistral yolda sürücüdən kobud səhv: Yol polisi araşdırmaya başladı

Bakı-Şamaxı magistralında minik avtomobili yol hərəkəti qaydalarını kobud şəkildə pozaraq qəza vəziyyəti yaradıb.

Daha sonra sürücü heç nə olmamış kimi yoluna davam edərək hadisə yerindən uzaqlaşıb.

Bu barədə videogörüntülər sosial şəbəkələrdə paylaşılıb.

Baş Dövlət Yol Polisi İdarəsindən bildirilib ki, qeyd edilən məsələnin araşdırılması və hadisəyə hüquqi qiymət verilməsi barədə zəruri addımlar atılacaq:

“Sözügedən videogörüntülərdə “Niva” markalı nəqliyyat vasitəsi yol hərəkəti qaydasını pozur. Bu davranışa görə həmin sürücüyə İnzibati Xətalar Məcəlləsinin 327.6 maddəsinə əsasən, 4 cərimə balı və 100 manat məbləğində cərimə protokolu tərtib ediləcək.

Həmin hadisədə zərərçəkən “Mitsubishi” markalı nəqliyyat vasitəsinin sürücüsünün videomateriallarla birlikdə BDYPİ-yə müraciət etməsi tövsiyə edilir”.

Baş Dövlət Yol Polisi İdarəsindən o da bildirilib ki, məsələ araşdırılaraq məlumatlar dəqiqləşdiriləcək və yekun nəticə barədə ictimaiyyətə məlumat veriləcək.