Masallıda müharibə iştirakçısını qətlə yetirdilər: iki nəfər şübhəli saxlanıldı

Masallıda qətl hadisəsi baş verib. Rayon sakini 25 yaşlı Elməddin Kərimov aldığı bıçaq zərbəsindən hadisə yerində dünyasını dəyişib.

Hadisənin təfərrüatına gəlincə, qətlə yetirilən 25 yaşlı Elməddin Kərimovla Masallı rayon Viləş kənd sakini 25 yaşlı Fuad Əsgərov arasında mübahisə yaranıb. Bu zaman Fuad Əsgərov dostu, Qızılağac kənd sakini 23 yaşlı Höccət Sultanova zəng edib. Onlar rayonun Olimpiya kompleksi deyilən ərazidə görüşüblər. Bu zaman Höccət Sultanov özü ilə gətirdiyi bıçaqla Elməddin Kərimovun ürək nahiyəsinə bir bıçaq zərbəsi vurub.

Dərhal hadisə yerinə təcili tibbi yardım briqadası cəlb olunub. Buna baxmayaraq, Elməddin Kərimovun həyatını xilas etmək mümkün olmayıb. O, aldığı xəsarətlərdən həyatını itirib.

Meyit müayinə olunması üçün Məhkəmə Tibbi Ekspertiza və Patoloji Anatomiya Birliyinin Masallı rayon şöbəsinə təhvil verilib. Qətli törətməkdə şübhəli bilinən Fuad Əsgərov və Höccət Sultanov saxlanılaraq istintaqa cəlb olunublar.

Qeyd edək ki, qətlə yetirilən Elməddin Kərimov Vətən müharibəsi iştirakçısı olub.

Faktla bağlı cinayət işi başlanıb, araşdırmalar davam etdirilir.