Maştağada qandonduran qətlin təfərrüatı | Elə şeylər üzə çıxdı ki...

Maştağa qəsəbəsində həmkəndlisini qətlə yetirməkdə təqsirləndirilən Rəşid Babayevin cinayət işi üzrə məhkəmənin baxış iclası keçirilib.

Bakı Ağır Cinayətlər Məhkəməsinin hakimi Samir Əliyevin sədrliyi ilə keçirilən prosesdə təqsirləndirilən şəxs məhkəməyə sərbəst ifadə verib.

Maştağa qəsəbə sakini, əvvəllər Cinayət Məcəlləsinin müxtəlif maddələri ilə məhkum olunmuş Rəşid Babayev həmkəndlisi Roman Əsgərovla hər hansı yaxın bir münasibətinin olmadığını vurğulayaraq hadisəni qorxduğu üçün qəfil törətdiyini deyib.

O, tək yaşadığını bildirərək qeyd edib ki, hadisə baş verən gün mənzilinin qapısı döyülüb, qapını açanda Romanın olduğunu görüb. Bu zaman Roman zorla içəri daxil olub. Romanın onu öldürməyindən qorxan Rəşid mətbəxdən götürdüyü bıçaqla ona zərbə endirib.

Rəşid Babayev ona ağır xəsarət yetirdiyinin fərqinə varmasa da, iki gün sonra Roman Əsgərovun 3 saylı Şəhər Klinik Xəstəxanasında dünyasını dəyişdiyini eşidib.

Məhkəmədə şahid kimi ifadə verən Maştağa sakini Hümbət Baratov hadisənin mühafizəçi çalışdığı parkdan bir qədər aralıda baş verdiyini bildirib. Qətlə yetirilən şəxsin çox vaxt parkda gecələdiyini və səfil həyat sürdüyünü deyib.

Qeyd edək ki, hadisə 2024-cü ilin mayında Sabunçu rayonu, Maştağa qəsəbəsində baş verib. Qəsəbə sakini, 1974-cü il təvəllüdlü Roman Əsgərov kəsilmiş-deşilmiş xəsarətlə xəstəxanaya çatdırılsa da, orada vəfat edib.

Sabunçu Rayon Polis İdarəsinin 14-cü Polis Şöbəsinin əməkdaşlarının həyata keçirdikləri əməliyyat-axtarış tədbirləri nəticəsində Roman Əsgərovu qətlə yetirməkdə şübhəli bilinən 1966-cı il təvəllüdlü, əvvəllər məhkum olunmuş Rəşid Babayev saxlanılıb.