Maştağada tükürpərdən hadisə | 3 il davam edən məhkəmədə nələr üzə çıxdı? - Baku TV

Ərinin qətlini sifariş verməkdə təqsirləndirilən Əzizə Seyidova və qətlin sifarişini icra etməkdə təqsirləndirilənlər – Mehdi Məmmədov, Elvin Əliyev və Bəxtiyar Fərzəliyevin məhkəməsində vəkillər ilginc faktlar ortaya qoyublar.

Bakı Ağır Cinayətlər Məhkəməsində hakim Roman Ələkbərlinin sədrliyi ilə keçirilən iclasda onların müdafiəçiləri Əzizə Seyidovanın ittiham olunduğu maddə üzrə təqsirinin sübuta yetirilmədiyini deyərək ibtidai istintaqda yol verilən yanlışlıqlardan danışıblar.

Əzizə Seyidovanın sifarişçi kimi ittiham olunduğuna rəğmən onun hansı məbləğə ərinin qətlini sifariş verdiyi məlum deyil. Müdafiəçilər bunu istintaqın yol verdiyi nöqsanlardan biri kimi qiymətləndirib.

Zərərçəkənin hüququ varisi isə vəkillərin ortaya qoyduqları arqumentlərə etirazını bildirərək məhkəmədən işə obyektiv qiymət verilməsini xahiş edib.

Müşavirədən sonra hökm elan edilərək Əzizə Seyidova 17 il, Mehdi Məmmədov 18 il 6 ay, Bəxtiyar Fərzəliyev və Elvin Əliyevin hər biri isə ayrı-ayrılıqda 17 il 6 ay azadlıqdan məhrum edilib.

Qeyd edək ki, hadisə 2023-cü il martın 15-də Sabunçu rayonunun Maştağa qəsəbəsində baş verib. İttihama görə, 23 yaşlı Əzizə Seyidova həyat yoldaşı Əli Seyidlini cəzalandırmaq istəyib. O, ərinin qətlini tanışı Mehdi Məmmədliyə sifariş verib. Onlar birlikdə plan qurub. Əli Seyidli evinə daxil olmaq istədikdə Mehdi Məmmədli və dostları onun qarşısını kəsərək ona 23 bıçaq zərbəsi endirməklə qətlə yetiriblər.

Onu da bildirək ki, məhkəmə istintaqı ərəfəsində təqsirləndirilənlər ibtidai istintaqa verdikləri ifadələrini dəyişərək qətlin Əzizə Seyidovanın sifarişi ilə deyil, Əli Seyidovla şəxsi münasibətləri zəminində törətdiklərini deyiblər.