Məktəbdə qorxulu anlar: qan töküldü | Valideynlər hadisəni inkar edir? - Baku TV

Ağstafa şəhər Səadət Şükürova adına 3 nömrəli məktəbdə insident baş verib.

Məktəbin doqquzuncu sinfində oxuyan iki şagird aralarında yaranmış mübahisə zamanı eyni məktəbin səkkizinci sinif şagirdinə xəsarət yetirib.

İddialara görə, xəsarət kəsici-deşici alətlə yetirilib. Lakin hadisəni törətməkdə şübhəli bilinən şagirdlərin valideynləri bu iddianı təkzib edirlər.

Onların sözlərinə görə, hadisə zarafat zamanı baş verib və xəsarət məftilin batması nəticəsində yaranıb.

“Burada bıçaqlanma olmayıb. Üçü də dostdur. Həmin uşaq tez-tez bizə gəlirdi. Zarafatlaşıblar, məftil batıb”, – deyə valideynlərdən biri bildirib.

Tibb müəssisəsindən verilən məlumata əsasən, zərərçəkənə sol budun deşilmiş yarası diaqnozu qoyulub, ona ilkin tibbi yardım göstərilib. Vəziyyəti qənaətbəxş olduğu üçün ambulator müalicəyə buraxılıb.

Faktla bağlı Ağstafa Rayon Polis Şöbəsinə məlumat daxil olub. Hazırda hadisə ilə bağlı araşdırma aparılır.