Məsciddə qətl törədən şəxs məhkəmədə danışdı - Baku TV

Bakının Bülbülə qəsəbəsində məsciddə qəsəbə sakinini qətlə yetirməkdə təqsirləndirilən 1996-cı il təvəllüdlü Elvin Məmmədovun cinayət işi üzrə məhkəmə baxışı keçirilib.

Prosesdə prokuror təqsirləndirilən şəxsə ittiham aktını elan edib. Elvin Məmmədov ittiham üzrə özünü təqsirli bilməyib.

O, hadisəni təhqir olunduğu üçün törətdiyini vurğulayıb: "Mən cinayəti törədəndə mərhum yatmış vəziyyətdə olmayıb. Hadisədən bir müddət əvvəl təxminən 10 nəfər tərəfindən döyülmüşəm, onların arasında Nadir Səfərov da olub. Məni qeyrətsiz adlandırıblar".

Daha sonra o, iyulun 26-da Nadiri tapmaq məqsədilə məscidə getdiyini, bıçağı da məsciddəki otaqlardan birindən götürdüyünü deyib:

"Namaz otağında Nadiri yatmış vəziyyətdə gördüm və oyadaraq ayağa qalxmasını tələb etdim. Başımda problem olduğundan özümdə deyildim. Bundan sonra əlbəyaxa olduq. Təxminən 10 zərbə endirmişəm. Amma istintaqda mənə dedilər ki, 30-dan çox xəsarət yetirmisən".

Növbəti proses fevralın 12-nə təyin edilib.