Məşhur tiktoker “Beniz”in hansı istəyi təmin edilmədi? | Məhkəmə barədə detallar

Tanınmış tiktoker “Beniz” ləqəbli Aybəniz Xəlilovanın cinayət işi üzrə Bakı Ağır Cinayətlər Məhkəməsində növbəti iclas keçirilib.

Hakim Fəxri Məmmədovun sədrliyi ilə keçirilən prosesdə vəkil xanım müvəkkilinin himayəsində azyaşlı övladının olmasını və səhhəti ilə bağlı müəyyən problemləri əsas gətirərək həbs qətimkan tədbirinin ev dustaqlığı ilə əvəz olunması barədə vəsatət qaldırıb. Lakin məhkəmə bu müraciəti təmin etməyib.

Zərərçəkən Xalid Kərimovun vəkili isə bəzi vəzifəli şəxslərlə bağlı faktların təqdim oluna biləcəyini bildirərək prosesin qapalı keçirilməsini xahiş edib. Məhkəmə bu təklifi qəbul etməsə də, zərərçəkənin xaricdə müalicədə olması səbəbindən iclasa videokonfransla qoşulmasına icazə verib.

Aybəniz Xəlilova ifadə verməkdən imtina edərək öncə zərərçəkənin dinlənilməsini istəyib. Növbəti proses 9 sentyabrda keçiriləcək və Xalid Kərimov ifadə verəcək.

Həm A.Xəlilova, həm də zərərçəkənin yeni vəkili tərəflər arasında hazırda münaqişə olmadığını bildiriblər.

Qeyd edək ki, A.Xəlilova sevgilisi olduğu iddia edilən Xalid Kərimovdan hədə-qorxu ilə hissə-hissə 836 min manat almaqda təqsirləndirilir. Ona qarşı Cinayət Məcəlləsinin 182.2.2 və 182.2.4 (hədə-qorxu ilə tələb etmə) maddələri ilə cinayət işi açılıb.