Müğənni Elariz Məmmədoğlunun kürəkəninə hökm oxundu

Valyuta alqı-satqısı həyata keçirməklə gəlir əldə etmək istəyən üç nəfərin külli miqdarda pulunu ələ keçirməkdə təqsirləndirilən Nizami Alışan 10 il müddətə azadlıqdan məhrum edilib.

Bu barədə hökm Bakı Ağır Cinayətlər Məhkəməsində hakim Aytən Əliyevanın sədrliyi ilə keçirilən prosesdə elan olunub.

Qeyd edək ki, cinayət işi üzrə Zeynal Usubov, Babək Məmmədzadə və Yadigar İsrafilov zərərçəkən kimi tanınıblar.

İttihama görə, təqsirləndirilən Nizami Alışan asan pul qazanmaq istəyən şəxslərə özünü səhm və valyuta alqı-satqısı ilə məşğul olan mütəxəssis kimi təqdim edib. Bununla da o, Babək Məmmədzadənin 1 milyon 300 min, Zeynal Usubovun 945 min, Yadigar İsrafilovun isə 200 min dollar pulunu ələ keçirməkdə ittiham olunub.

Zərərçəkənlərə dəyən ümumi ziyan 2 milyon 445 min dollar, yəni 4 milyon 156 min 500 manat təşkil edir. Nizami Alışan Cinayət Məcəlləsinin dələduzluq, xüsusilə külli miqdarda ziyan vurmaqla törədildikdə maddəsi ilə təqsirli bilinir.

Xatırladaq ki, Nizami Alışan Amerika Birləşmiş Ştatlarında yaşayan müğənni Elariz Məmmədoğlunun kürəkəni, “AzTV”nin keçmiş sədri Arif Alışanovun isə qardaşı oğludur.