Müğənninin evinə basqın etməkdə təqsirləndirilənlər hakim qarşısında

Müğənni Elçin Kişiyevə qarşı quldurluq etməkdə təqsirləndirilən Hökumə Əşrəfzadə, onun bacısı Rəhimə Əşrəfzadə və digərləri Heydər Əkbərov və Zeynal Yusifovun cinayət işi üzrə məhkəmənin növbəti baxış iclası keçirilib.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə baş tutan prosesdə zərərçəkən müğənni Elçin Zəka təqsirləndirilən şəxslərdən Heydər Əkbərov, Rəhimə və Hökümə Əşrəfzadə bacıları tərəfindən ona dəymiş ziyanın ödənildiyini vurğulayaraq, onlarla barışdığını deyib. Digər təqsirləndirilən Zeynal Yusifovun isə zərərin ödənilməsi ilə bağlı hər hansı bir addım atmamasına görə ondan şikayətçi olduğunu deyib.

Bundan sonra prokuror Tural Yaqubov təqsirləndirilən şəxslərə ittiham tərəfinin nəzərdə tutduğu cəzaları məhkəmə heyətinə təklif edib. Dövlət ittihamçısı Rəhimə və Hökümə bacılarının hər birinin 10 il, Heydər Əkbərovun 11 il, Zeynal Yusifovun isə 12 il 6 ay azadlıqdan məhrum edilməsini təklif edib.

Çıxış üçün söz müdafiə tərəfinə verilsə də, vəkillər buna hazır olmadığından məhkəmədən vaxt istəyiblər. Növbəti proses iyunun 14-nə təyin olunub.