Nadirə yatdığı yerdə 38 bıçaq zərbəsi | Məsciddə adam öldürənə hökm oxundu - Baku TV

Bakının Bülbülə qəsəbəsində məsciddə qəsəbə sakinini qətlə yetirməkdə təqsirləndirilən 30 yaşlı Elvin Məmmədovun cinayət işi üzrə məhkəməsi yekunlaşıb.

Bakı Ağır Cinayətlər Məhkəməsinin hakimi Azər Tağıyevin sədrliyi ilə keçirilən prosesdə dövlət ittihamçısı təqsirləndirilənin 18 il 6 ay müddətinə azadlıqdan məhrum edilməsini məhkəməyə təklif edib. Müşavirədən sonra hökm elan edilərək Elvin Məmmədov 17 il müddətinə azadlıqdan məhrum edilib.

Qeyd edək ki, hadisə 2025-ci ilin iyulun 26-da Bülbülə qəsəbəsindəki “İmamzadə” məscidində baş verib. Araşdırma zamanı məlum olub ki, Elvin Məmmədov namaz otağında yatmış vəziyyətdə olan 36 yaşlı Nadir Səfərova 38 bıçaq zərbəsi vuraraq, onu qətlə yetirib.

Təqsirləndirilən şəxs 31-ci polis şöbəsinin əməkdaşları tərəfindən saxlanılıb. Ona qarşı Cinayət Məcəlləsinin 120.2.2-ci (xuliqanlıq niyyəti ilə qəsdən adam öldürmə), 120.2.4-cü (xüsusi amansızlıqla qəsdən adam öldürmə) və 120.2.9-cu (köməksiz vəziyyətdə olan adamı qəsdən öldürmə) maddələri ilə ittiham irəli sürülüb.