Nazirliyin Şirvandakı zavodunda partlayış: ölən və yaralanan var

Müdafiə Sənayesi Nazirliyinin Şirvan şəhərində yerləşən zavodunda sursat partlayışı olub.

Nazirliyin İnformasiya texnologiyaları şöbəsinin müdiri Yaşar İsakov Baku TV-yə bildirib ki, hadisə saat 12:00 radələrində “Şirvan Araz zavodu” Məhdud Məsuliyyətli Cəmiyyətində M6 partladıcı başlığın aralıq ötürücüsünü sıxarkən baş verib.

Partlayış nəticəsində işçi 1966-cı il təvəllüdlü Mehman Əhmədov dünyasını dəyişib. Şirvan sakini 1970-ci il təvəllüdlü Səbinə Şəkərova isə əlindən xəsarət alıb.

Baş Prokurorluğun mətbuat xidmətindən bildirilib ki, faktla bağlı Şirvan Şəhər Prokurorluğunda araşdırma aparılır. Hazırda hadisə yeri şəhər prokurorluğunun əməkdaşları və prokuror-kriminalist tərəfindən müayinə olunur.