Oğul anasını 5 bıçaqla qətlə yetirdi? - “Tez-tez vururdu, içəridən səs gəldi ki...” - Baku TV

Gəncədə 64 yaşlı qadın qətlə yetirilib.

Hadisə günorta saat 12 radələrində şəhərin ərazisində yerləşən bazarların birində, paltar satılan bölmədə baş verib.

Ərazidə fəaliyyət göstərənlərin sözlərinə görə, paltar satışı ilə məşğul olan 64 yaşlı Laləzar Verdiyevanın oğlu onun yanına gəlib. Daha sonra mağazaya girərək jalüzü bağlayıb və anası ilə mübahisə etməyə başlayıb. Bir qədər sonra mağazanı tərk edən şəxs əlində bıçaqla ərazidən qaçıb. Şahidlər mağazaya daxil olduqda Laləzar Verdiyevanı yaralı vəziyyətdə görüblər.

Hadisə yerinə tibbi yardım briqadası çağırılıb və qadın xəstəxanaya çatdırılıb. Lakin onun həyatını xilas etmək mümkün olmayıb.

Bazar rəhbərliyinin məlumatı əsasında əraziyə hüquq-mühafizə orqanlarının əməkdaşları dəvət olunub. İlkin əməliyyat-istintaq tədbirləri həyata keçirilib və qətl törətməkdə şübhəli bilinən 44 yaşlı Ramin İsmayılov saxlanılaraq istintaqa təhvil verilib.

Bazarda çalışan və Laləzar Verdiyevanı tanıyan şəxslərin sözlərinə görə, Ramin İsmayılov tez-tez bura gələrək anası ilə mübahisə edir və ondan pul tələb edirmiş. Sonuncu mübahisənin də bu zəmində baş verdiyi güman edilir. Tanışları qətldə şübhəli bilinən şəxsin narkotik aludəçisi olduğunu da iddia edirlər.

“Xırıltı səsi gəldi. Girdim içəriyə, qadın qanın içində idi. Dedi ki, kömək et, qan apardı məni. Oğlu ürəyinə beş dəfə bıçaqla vurub. Deyilənə görə, tez-tez gəlib pul istəyirdi anasından”, – hadisə şahidi deyib.