Olimpiya kompleksinin qarşısında dava qətllə bitdi

Maştağa Olimpiya Kompleksinin qarşısında dava zamanı qətl törədib, hadisə yerindən qaçan İlqar İsmayılovun cinayət işi üzrə məhkəmə prosesi başa çatıb. Hadisə 2021-ci il sentyabrın 15-də baş verib.

İstintaqla müəyyən edilib ki, İlqar İsmayılov Sabunçu qəsəbəsində bir yerdə kirayədə yaşadığı Akif Cəbiyev və onun iş yoldaşı Elnur Çobanovla sentyabrın 14-də axşam saatlarında Kürdəxanı qəsəbəsində yerləşən kafedə yeyib-içiblər. Sonra pivə içmək üçün taksi ilə Maştağa Olimpiya İdman Kompleksinin qarşısında yerləşən digər kafeyə gəliblər.

Avtomobildən düşəndə tanımadığı Elzamin Əsədov, Ümid Bayramov və Cabir Abulov yaxınlaşaraq, onlardan taksidən tez düşmələrini tələb ediblər. Aralarında mübahisə yaranıb. Elnurun Elzaminlə əlbəyaxa olacaqlarını görən İlqar maşından düşərək, onlara dalaşmamalarını bildirib və qarşı tərəfin ünvanına nalayiq ifadələr işlədib. Cabir Abulovun söyüş söyməməsinə dair haqlı İrad bildirməsindən sonra o, üzərindəki bıçaqla onun qarın nahiyəsinə bir dəfə zərbə vurub. Bununla İlqar Cabiri qəsdən öldürüb.

Məhkəmə iclasında İlqar İsmayılov ittiham üzrə özünü təqsirli bilməyərək, ona bəraət verilməsini istəyib. Bakı Ağır Cinayətlər Məhkəməsinin hökmü ilə İlqar İsmayılov 18 il müddətinə azadlıqdan məhrum olunub.