Paytaxt və bölgələrdə genişmiqyaslı əməliyyat

Paytaxt və bölgələrdə təhlükəsizliyin təmin olunması, qanunsuz silah və narkotik dövriyyəsinin qarşısının alınması istiqamətində əməliyyat tədbirləri keçirilib.

Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həyata keçirilən tədbirlər zamanı cinayət törətməyə meyilli, kriminal həyat tərzini təbliğ edən, hədə-qorxu yolu ilə pul tələb edən və odlu silah-sursat saxlayan 20-dən artıq şəxs saxlanılıb.

Onlardan xeyli sayda “Kalaşnikov” avtomatı, müxtəlif markalı tapançalar və patronlar aşkarlanaraq götürülüb.

Eyni zamanda narkotik vasitələrin qeyri-leqal dövriyyəsinin qarşısının alınması istiqamətində keçirilən əməliyyatlar nəticəsində ümumilikdə 142 kiloqram müxtəlif adda narkotik dövriyyədən çıxarılıb.

Cinayətkar qruplara qarşı aparılan tədbirlər zamanı 3 mütəşəkkil dəstənin üzvləri və ümumilikdə 7 nəfər saxlanılıb.