Qadın qızının müəllimi ilə ərini aldadıb? - Bakıdakı dəhşətli hadisənin detalları

2023-cü il yanvarın 21-də baş nahiyəsindən ağır xəsarətlər alan Ceyhun İmaşov 1 saylı Şəhər Kliniki Xəstəxanasına daxil olaraq dərhal əməliyyata götürülüb. Həkimlərin müdaxiləsi nəticəsində onun həyatını xilas etmək mümkün olub.

Hadisə ilə əlaqədar Qaradağ Rayon Polis İdarəsinin növbətçi hissəsinə məlumat verilib. Məlum olub ki, hadisə Qızıldaş qəsəbəsinin 4-cü massivində yerləşən fərdi evdə baş verib. İlkin araşdırmalara görə, zərərçəkmişə xəsarətlər arvadı Lalə İmaşova tərəfindən yetirilib.

İstintaqla müəyyən edilib ki, yanvarın 21-i səhər saat 5 radələrində Ceyhun İmaşov Lalə İmaşovanın mobil telefonunda “Whatsapp” tətbiqi vasitəsilə naməlum profildən daxil olmuş ismarıc görüb və yoldaşını ona xəyanət etməkdə günahlandırıb.

Aralarında davam edən mübahisə zamanı qadın dəhlizdən götürdüyü baltanın kəsici hissəsi ilə qonaq otağında ərinin baş nahiyəsinə arxadan iki dəfə zərbə vurub. Ceyhun İmaşov vaxtında xəstəxanaya çatdırıldığından qadın iradəsindən asılı olmayan səbəbdən cinayəti başa çatdıra bilməyib. Bu hərəkəti ilə Lalə İmaşova zərərçəkmişi qəsdən öldürməyə cəhd edib.

Bakı Ağır Cinayətlər Məhkəməsinin hökmü ilə Lalə İmaşova Cinayət Məcəlləsinin qəsdən adam öldürməyə cəhd maddəsi ilə təqsirli bilinərək 9 il müddətinə azadlıqdan məhrum olunub.