Qandonduran hadisə | Arvadını öldürməkdə təqsirləndirilən Səməndərin aqibəti necə oldu? - Baku TV

Bakıda həyat yoldaşını qətlə yetirməkdə və ona qısqandığı taksi sürücüsünü yaralamaqda təqsirləndirilən Əfqanıstan vətəndaşı Səməndər Səfayinin cinayət işi üzrə məhkəməsi yekunlaşıb.

Bakı Ağır Cinayətlər Məhkəməsinin hakimi Nigar İmanovanın sədrliyi ilə keçirilən iclasda tərəflər arasında barışıq əldə edildiyi elan edildikdən sonra dövlət ittihamçısı çıxış edərək təqsirləndirilənin 18 il azadlıqdan məhrum edilməsini məhkəməyə təklif edib. Müşavirədən sonra hökm elan edilərək Səməndər Səfayi 16 il müddətinə azadlıqdan məhrum edilib.

Qeyd edək ki, hadisə 2025-ci il iyulun 9-da paytaxtın Binəqədi rayonunda qeydə alınıb. Qəsəbə sakini Nüşabə Səfərovanın (Səfayi) qəsdən öldürülməsi barədə rayon prokurorluğuna məlumat daxil olub.

Binəqədi Rayon Prokurorluğunda aparılmış araşdırmalarla zərərçəkmişin əri, Əfqanıstan vətəndaşı Səməndər Səfayinin mübahisə zamanı arvadını qısqanclıq zəminində bıçaqlayaraq öldürməsinə və həyat yoldaşına qısqandığı Canmirzə Cabbarovu öldürməyə cəhd etməsinə əsaslı şübhələr müəyyən edilib.

Faktla bağlı Binəqədi Rayon Prokurorluğunda Cinayət Məcəlləsinin 120.2.1 (qəsdən adam öldürmə) və 29, 120.2.7-ci (iki və ya daha çox şəxsi öldürməyə cəhd) maddələri ilə cinayət işi başlanılıb.