Qanun pozuntularına görə qurumlara təqdimat göndərildi | Saxlanılanlar var

Korrupsiyaya qarşı Mübarizə Baş İdarəsi korrupsiya cinayətlərinə şərait yaradan halların aradan qaldırılması, yol verilən qanun pozuntularının səbəblərinin müəyyən edilməsi və bir daha törədilməməsi üçün müxtəlif qurumlara 110 təqdimat göndərib.

Bu barədə Baş prokuror yanında Korrupsiyaya qarşı Mübarizə Baş İdarəsində 2024-cü ilin I yarımilinə həsr olunmuş əməliyyat müşavirəsində bildirilib.

Qeyd olunub ki, 2024-cü ilin altı ayı ərzində korrupsiya cinayəti törədən 25 şəxs cinayət başında yaxalanıb, habelə axtarışda olan 4 nəfər saxlanılıb. Həmin müddətdə 93 cinayət işi başlanıb. 150 şəxs barəsində isə 111 cinayət işinin ibtidai istintaqı tamamlanıb.

Bu çərçivədə 122 şəxs barəsində 93 cinayət işi baxılması üçün məhkəmələrə göndərilib. İstintaqı başa çatdırılmış cinayət işləri üzrə isə ümumilikdə özgə əmlakına vurulmuş 61 milyon 909 min 129 manat məbləğində maddi ziyandan 40 milyon 386 min 399 manatının ödənilməsi təmin olunub.

Zərərin ödənilməsi məqsədilə istintaqı başa çatdırılmış cinayət işləri üzrə 8 milyon 32 min 611 manat məbləğində əmlak üzərinə həbs qoyulması təmin olunub.