Qarətçi hakim qarşısında çıxış etdi | Cinayətkara ağır cəza verildi

Bakı Dövlət Universitetinin professoru, vəkil Mais Əliyevə qarşı quldurluq edərək onun külli miqdarda pulunu ələ keçirməkdə təqsirləndirilən Ceyhun Məmmədovun məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Rasim Sadıxovun sədrliyi ilə keçirilən son prosesdə dövlət ittihamçısı Rauf Malışov ittiham nitqi ilə çıxış edərək təqsirləndirilən Ceyhun Məmmədovun ittiham olunduğu Cinayət Məcəlləsinin 181.2.5 (quldurluq) maddəsi ilə 12 il azadlıqdan məhrum edilməsini məhkəməyə təklif edib.

İttiham olunan Ceyhun Məmmədov son sözlə çıxış edərək deyib ki, o, Mayis Əliyevdən borc almağa gedib. Ona qarşı heç bir quldurluq etməyib. Bu səbəbdən də irəli sürülən ittiham üzrə özünü təqsirli bilməyib.

Qısa müşavirədən sonra məhkəmə ittiham olunan şəxsin 10 il azadlıqdan məhrum edilməsi ilə bağlı hökmü elan edib.

Qeyd edək ki, ittihama əsasən, 31 yaşlı Ceyhun Məmmədov Bakı Dövlət Universitetinin professoru, hüquq və elmlər doktoru, vəkil Mayis Əliyevə evində hücum edib. Bank proqramı vasitəsilə onun kartında olan 8 min manatı öz kartına köçürüb. Bundan başqa, nağd pul və digər əşyaları götürərək evdən qaçıb. Ceyhun Məmmədov barəsində Cinayət Məcəlləsinin 181-ci (quldurluq) maddəsinin bir neçə bəndi ilə cinayət işi açılıb.