Qaya parçaları dağlardan qoparaq avtomobil yollarına tökülüb

İyunun 30-u axşam saatlarında Daşkəsənə yağan intensiv leysan yağışları qısa müddətdə güclü dağıdıcı selə və çaylarda daşqınlara səbəb olub.

Daşkəsən şəhərindən, eləcə də rayonun Qabaqtəpə, Əmirvar, Gurbulaq, Dəstəfur, Alaxançallı, Xoşbulaq, Çovdar, Çanaqçı və Qaraqullar kəndlərindən sel keçib, ərazidəki çaylar məcrasından çıxaraq daşıb.

Rayonun yol infrastrukturuna, elektrik xətlərinə, fərdi yaşayış evlərinə, əkin sahələrinə, heyvandarlıq və arıçılıq təsərrüfatlarına ziyan dəyib. Dağlardan qaya parçaları və palçıq kütlələri avtomobil yollarına töküldüyündən bəzi yollarda nəqliyyatın hərəkəti dayanıb, bir neçə yaşayış evinə su dolub.

Daşkəsən Rayon İcra Hakimiyyətinin yanında Fövqəladə Hallar Komissiyası təbii fəlakət zamanı rayona dəyən ziyanın aradan qaldırılması istiqamətində ərazidə işlərə başlayıb.