Qaynaq etmək istəyən sürücü dəhşət yaşadı | Salyandakı hadisənin detalları

Salyanda iritonnajlı yük maşınının çəninin partlaması nəticəsində nəqliyyatın sürücüsü və onun oğlu yanıq xəsarətləri alıb.

Hadisə rayonun Şorsulu kəndində baş verib.

Belə ki, sürücü Paşa Əliyev özünəməxsus TIR yük maşınında qaynaq işləri apararkən ehtiyatsızlıqdan yük maşınının çəni partlayıb.

Yanğın yerinə Fövqaladə Hallar Nazirliyinin müvafiq yerli bölmələri çağrılıb. Yanğının yaxınlıqdakı elektrik xətlərinə keçməməsi üçün ərazidə işıqlar dərhal söndürülüb.

Qeyd edək ki, hadisə nəticəsində rayonun Şorsulu kənd sakinləri – 42 yaşlı Paşa Əliyev və onun oğlu 16 yaşlı Qismət Əlizadə müxtəlif dərəcəli texniki yanıq xəsarətləri alıblar.

TƏBİB-dən bildirilib ki, 25 yanvar saat 18:00 radələrində 2 nəfər Salyan Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

1983-cü il təvəllüdlü şəxsə hər iki əlin II dərəcəli termiki yanığı, sağ ayağın II dərəcəli termiki yanığı diaqnozları təyin edilib. Zəruri tibbi yardımlar göstərilib və ambulator müalicə üçün evə buraxılıb.

2009-cu il təvəllüdlü şəxsə yanağın, alının II dərəcəli termiki yanığı, hər iki saidin və əlin II dərəcəli termiki yanığı, hər iki baldırın və ayağın II dərəcəli termiki yanığı diaqnozları təyin edilib.

İlkin tibbi yardım göstərilib və daha ixtisaslı tibbi xidmət almaq üçün Nərimanov Tibb Mərkəzinin nəzdində olan Yanıq Mərkəzinə təxliyə olunub.

Faktla bağlı araşdırma aparılır.