Qazaxda ailə faciəsi: ana və övladları Kürdə batdı

Şəmkirdə Kürdə batan ana və iki oğlu Qazaxda dəfn edilib.

Qazax rayonunun Canalı kəndində yaşayan Günay Kərimova oğlanları Nurlan və Aqşin Kərimovlarla birgə Şəmkirə istirahətə gediblər.

Kərimovlar ailəsi Kür çayının Şəmkir rayon Dəllər Cırdaxan kəndindən keçən hissəsindəki göldə dincəlmək istəyiblər. Evin kiçik oğlu 15 yaşlı Aqşin Kərimov çimmək üçün suya atılıb. Hadisə şahidi Eldəniz Cəfərov boğulmaq üzrə olan Aqşini sudan çıxarmağa çalışıb. Bu zaman qardaşı 20 yaşlı Nurlan Kərimov, ardınca da anası 38 yaşlı Günay Kərimova özünü suya atıb. Nəticədə nə edəcəyini bilməyən Eldəniz Cəfərov özü də boğulmaq təhlükəsi ilə üz-üzə qalıb.

Qısa müddətdə ana və iki oğlu suda boğularaq dünyalarını dəyişiblər. Onların meyitləri tapılıb və aidiyyəti üzrə təhvil verilib.

Ana və oğullarının cansız bədənləri Canalı kənd qəbiristanlığında torpağa tapşırılıb. Faktla bağlı araşdırmalar davam etdirilir.