Qazaxda güclü mina partlayışı | Yaralananlarla bağlı təcili məlumat

Qazax rayonunun Qızılhacılı kəndində mina partlayıb.

Hadisə barədə Baş Prokurorluq, Dövlət Sərhəd Xidməti və Minatəmizləmə Agentliyi birgə məlumat yayıb.

Bildirilib ki, avqustun 2-də Azərbaycan-Ermənistan sərhədinin delimitasiyası ilə bağlı bu il aprelin 19-da əldə olunmuş razılaşma əsasında ölkəmizə geri qaytarılmış Qazax rayonunun Qızılhacılı kəndində Ermənistan tərəfindən basdırılmış minalar partlayıb.

Nəticədə Dövlət Sərhəd Xidmətinin hərbi qulluqçusu gizir Xəyal Əhədli və Minatəmizləmə Agentliyinin əməkdaşı Afiq Mehdizadə minatəmizləmə işləri zamanı xidməti vəzifələrini icra edərkən piyada əleyhinə mina partlayışı nəticəsində ayaq nahiyələrindən xəsarət alıblar. Agentliyin əməkdaşları Elçin Ələkbərov və Yavər Mirzəyev isə qəlpə yaraları alıblar.

Xəsarət alan şəxslər ilkin tibbi yardım göstərilməklə dərhal xəstəxanaya çatdırılıblar. Həyatları üçün təhlükə yoxdur.

Hazırda Şəmkir Hərbi Prokurorluğunun və Qazax Rayon Prokurorluğunun əməkdaşları tərəfindən hadisə yeri müayinə olunur və digər zəruri prosessual hərəkətlər icra edilir.

Faktla bağlı prokurorluq orqanlarında araşdırma aparılır.