Qazaxda universitetdə kütləvi zəhərlənmə | AQTA və Baş Prokurorluqdan təcili açıqlama

Qazaxda 18 tələbə zəhərlənib.

Hadisə oktyabrın 10-da Bakı Dövlət Universitetinin Qazax filialının bufetində baş verib. Belə ki, dönər yeyən 18 tələbənin halı pisləşib və onlar xəstəxanaya yerləşdiriliblər.

Qazax Rayon Mərkəzi Xəstəxanasından verilən məlumata görə, zəruri tibbi yardım göstərildikdən sonra 16 nəfər ambulator müalicə üçün evə buraxılıb, iki nəfərin müalicəsi isə təcili tibbi yardım bölməsində davam etdirilir.

Baş Prokurorluğun mətbuat xidmətindən bildirilib ki, baş verən hadisə ilə bağlı araşdırma başlanılıb:

“Zəhərlənmənin səbəbinin müəyyənləşdirilməsi məqsədilə prokurorluq əməkdaşları tərəfindən Azərbaycan Respublikasının Qida Təhlükəsizliyi Agentliyi əməkdaşlarının iştirakı ilə yeməkxanadakı qidalardan nümunələr götürülərək müvafiq ekspertizalar təyin edilib və digər zəruri prosessual hərəkətlər icra olunub”.