Qazaxıstanda qaçaqmalçı qrupun lideri Azərbaycanda saxlanıldı

Qazaxıstanın hüquq-mühafizə orqanlarının əməkdaşları qaçaqmalçılıqla məşğul olan cinayətkar qrupun yaradılmasında və ona rəhbərlik etməkdə şübhəli bilinən şəxsi Azərbaycandan təhvil alıblar.

Qazaxıstan Baş Prokurorluğunun yaydığı məlumata görə, sözügedən şəxs 2016-2018-ci illərdə ölkəsinə qaçaqmalçılıq yolu ilə istehlak mallarının ötürülməsi prosesi ilə məşğul olan cinayətkar qrupa rəhbərlik edib.

Bundan əlavə, o gömrük rüsumlarını və vergiləri ödəməkdən boyun qaçırıb. Nəticədə ölkəyə təxminən 8,9 milyon ABŞ dollarından çox ziyan dəyib. Lakin həmin şəxs məsuliyyətdən yayınmaq üçün gizlənib və bu səbəbdən də, beynəlxalq axtarışa verilib. Daha sonra sözügedən şəxs Azərbaycan ərazisində tapılıb və həbs edilərək Qazaxıstan hüquq-mühafizə orqanları əməkdaşlarına təhvil verilib.

Qeyd edək ki, həmin cinayətin törədilməsinə görə əmlakın müsadirə olunması ilə birlikdə 7 ildən 12 ilədək müddətə azadlıqdan məhrumetmə cəzası nəzərdə tutulur.