"Qərbi azərbaycanlıları söydü..." I Qadına 23 bıçaq zərbəsi vuran şəxs - Baku TV

Bakıda sələmçini öldürməkdə təqsirləndirilən Elçin Vəliyevin cinayət işinin məhkəmə baxışı keçirilib.

Bakı Ağır Cinayətlər Məhkəməsinin hakimi Aygün Qurbanovanın sədrliyi ilə keçirilən iclasda Elçin Vəliyevin əvvəllər qeyri-rəsmi nikahda yaşadığı qadının anası Təranə Cəfərxanovadan faizə pul götürdüyü və daha sonra onu geri qaytarmaqdan imtina etdiyi bildirilib. Yaranan mübahisə zamanı Elçin yaşlı qadının bədəninə ümümilikdə 23 bıçaq zərbəsi endirib. Təranə Cəfərxanova bir neçə gün sonra aldığı xəsarətlərdən xəstəxanada həyatını itirib.

Təqsirləndirilən şəxs ittihamla özünü qismən təqsirli bilərək hadisəni tamah məqsədilə deyil, nəslinin təhqir olunması ilə əsaslandırıb.

"Faizə pul götürmüşdüm və həmişə vaxtında qaytarırdım. Son vaxtlar vəziyyətim yaxşı olmadığı üçün gecikmələr olurdu. Sonuncu dəfə görüşəndə məni təhqir etməyə başladı. Qərbi azərbaycanlıların ünvanına nalayiq ifadələr işlətdi. Bundan sonra onun ağzından vurmaq istədim, bilmədim harasına dəydi", – deyə Elçin Vəliyev diqqətə çatdırıb.

Zərərçəkənin hüquqi varisi Habil Quliyev isə vurğulayıb ki, Elçin Vəliyev onun bacısı ilə qeyri-rəsmi ailəli olub və onların 22 yaşlı bir övladları da var. Hüquqi varis mərhum anasının işlətdiyi o ifadəni ümümi yox, şəxsən Elçin Vəliyevin ünvanına səsləndirdiyini qeyd edib.

Növbəti proses fevralın 2-nə təyin edilib.