Qırmızı işıqdan keçən sürücü qəza törədib

Yasamal rayonunda yol-nəqliyyat hadisəsi zamanı bir nəfər xəsarət alıb. Hadisə 3 saylı ASAN Xidmət Mərkəzinin qarşısında baş verib.

Belə ki, Abdullayev Elçin Yusif oğlu idarə etdiyi “NAZ Lifan” markalı minik avtomobili ilə hərəkətdə olarkən işıqforun qırmızı işığından keçərək yoluna davam edib.

Bu zaman onun avtomobili Qasımov Ramin Mahir oğlunun idarə etdiyi “Opel” markalı nəqliyyat vasitəsinə çırpılıb.

Zərbənin gücündən “Opel” səkiyə və yol kənarındakı marketə çırpılıb.

Qəza nəticəsində “NAZ Lifan”da olan sərnişin, 17 yaşlı Ağayev İlkin Rafael oğlu xəsarət alıb. Yaralı 1 saylı Klinik Tibbi Mərkəzə yerləşdirilib. İlkin Ağayevə qapalı kəllə-beyin travması diaqnozu qoyulub.

Lakin “NAZ Lifan”ın sürücüsü qəza zamanı alan olmadığını iddia edib. Hadisə zamanı avtomobillərə ciddi ziyan dəyib.

Faktla bağlı əraziyə Yasamal Rayon Polis İdarəsinin əməkdaşları cəlb olunub, avtotexniki ekspertiza təyin edilib.

Hadisənin təfərrüatı araşdırılır.

Kamil Əmirli

Elşad Mətləboğlu