Qırmızı işıqdan keçən xanım sürücü qəza törədib

Nərimanov rayonunda yol-nəqliyyat hadisəsi zamanı 1 nəfər xəsarət alıb.

Qəza Ziya Bünyadov və Atatürk prospektlərinin kəsişməsində baş verib.

İlkin məlumata görə, Lamiyə Əbəçiyeva idarə etdiyi “Jeep” markalı avtomobillə Ziya Bünyadov prospektilə hərəkətdə olan zaman işıqforun qırmızı işığından keçərək yoluna davam edib.

Bu zaman onun avtomobili Atatürk prospektində hərəkətdə olan və Elnur Məmmədovun idarə etdiyi “Range Rover” markalı nəqliyyat vasitəsinə çırpılıb.

Zərbənin gücündən “Range Rover” əvvəlcə səkiyə, daha sonra körpünün dirəklərinə dəyərək dayanıb.

Hadisə nəticəsində E.Məmmədovun xəsarət aldığı bildirilir.

Əraziyə Nərimanov Rayon Dövlət Yol Polisi İdarəsinin əməkdaşları cəlb olunub, avtotexniki ekspertiza təyin edilib.

Hər iki sürücü ifadələrinin alınması üçün polis orqanına dəvət edilib.

Faktla bağlı araşdırma aparılır.

Kamil Əmirli

Elşad Mətləboğlu