"Nə olsa da, bunu etməməlidir" | Küsən sürücünün hərəkəti sərnişinləri şoka saldı - Baku TV

Sosial şəbəkələrdə yayılan görüntülər ictimai nəqliyyatda baş verən hadisəni gündəmə gətirib.

Belə ki, avtobusda sərnişinlərdən biri səhvən “Stop” düyməsini basıb. Bundan sonra sürücü avtobusu saxlayaraq nəqliyyat vasitəsindən enib və bir müddət fasilə verib.

Bu vəziyyət sərnişinlərin narazılığına səbəb olub. Onlar baş verənləri lentə alaraq sosial şəbəkələrdə paylaşıblar.

Baku TV məsələ ilə bağlı vətəndaşların fikirlərini öyrənib.

“İnsan əsəbiləşə bilər. Hamımız insanıq və bir-birimizi başa düşməliyik. Amma sürücü buna görə avtobusdan düşməməli idi”, – deyə sürücülərdən biri bildirib.

“Sürücü heç bir halda iş yerini tərk edib gedə bilməz. Çünki avtobusda ondan başqa sərnişinlər də var”, – deyə sakin qeyd edib.

Məsələ ilə bağlı “BakuBus” MMC-yə sorğu ünvanlanıb. Qurumdan bildirilib ki, şirkətin istismarında olan 13 nömrəli müntəzəm marşrut xətti üzrə hərəkət edən avtobuslardan birində sürücü ilə sərnişin arasında baş vermiş insident araşdırılıb. 

Araşdırma zamanı sürücünün xidməti vəzifələrinin icrası zamanı pozuntuya yol verdiyi müəyyən edilib. Sürücünün izahatı alınıb və Azərbaycan Respublikasının Əmək Məcəlləsinin tələblərinə uyğun olaraq barəsində müvafiq tədbirlər görülüb.

“BakuBus” MMC yaranmış narahatlığa görə sərnişinlərdən üzr istəyib. Həmçinin gələcəkdə bu kimi halların təkrarlanmaması məqsədilə sürücülərin xidməti fəaliyyətinə nəzarətin gücləndirilməsi və daxili intizam mexanizmlərinin təkmilləşdirilməsi istiqamətində tədbirlərin davam etdiriləcəyi bildirilib.