"Ölümü"nü səhnələşdirən şirkət rəhbərinə hökm oxundu
“Ölümünü” səhnələşdirən və dələduzluqda təqsirləndirilən MTK rəhbəri Rafət Qəniyevin cinayət işi üzrə məhkəmə prosesi başa çatıb.
Bakı Ağır Cinayətlər Məhkəməsinin hakimi Səbinə Məmmədzadənin sədrliyi ilə keçirilən sonuncu prosesdə hökm elan edilib.
Xatırladaq ki, ötən prosesdə prokuror Ziya Mansurov təqsirləndirilən şəxsin 11 il müddətinə azadlıqdan məhrum edilməsini istəyib. İttihama görə, 2021-ci il noyabrın 25-də Sabirabad Rayon Prokurorluğuna rayonun Bulduq kəndi ərazisində yolun kənarında yanmış avtomobildə sümük qalıqlarının aşkar edilməsi barədə məlumat daxil olub.
İlkin araşdırmalarla müəyyən edilib ki, Sabirabad-Qaragüney yolunda yanmış vəziyyətdə olan avtomobil 1980-ci il təvəllüdlü Rafət Qəniyevə məxsusdur. Avtomobildən aşkar edilmiş sümüklərin Rafət Qəniyevə məxsus olub-olmamasını müəyyən etmək üçün məhkəmə-tibbi kriminalistik və məhkəmə genetik ekspertizası təyin edilib.
Aparılmış çoxsaylı araşdırmalarla Rafət Qəniyevin ölmədiyi, direktoru olduğu “Caspian İnşaat MB” MTK-ya məxsus Bakı şəhərində yerləşən binanın mənzillərinin satışında dələduzluq əməllərinə yol verdiyi üçün cinayət məsuliyyətindən yayınmaq məqsədilə bu addımı atdığı məlum olub.
O, avtomobili qəsdən yandıraraq içərisinə mənşəyi bilinməyən heyvan sümüyü atmaqla yanaraq ölməsi görüntüsünü yaradıb.
Sabirabad Rayon Prokurorluğu və Rayon Polis Şöbəsi əməkdaşları tərəfindən aparılmış tədbirlərlə Rafət Qəniyevin olduğu yer müəyyən edildikdən sonra o, Yasamal rayonunda yerləşən mağazalardan birində şəxsiyyət vəsiqəsi ilə televizor alarkən saxlanılıb.
Rafət Qəniyevin barəsində Cinayət Məcəlləsinin 178.2.3 – külli miqdarda dələduzluq törətmək maddəsi ilə ittiham elan edilib.