"Qobu Park-3"də qandonduran qətl | Təcili yardım çağırmağa qoymadı ki...

Lökbatan qəsəbəsi, “Qobu Park-3” yaşayış kompleksində qətl hadisəsi baş verib. Binanın 52 nömrəli mənzilində, divanda 35 yaşlı Bəhruz Məmmədovun meyiti aşkar edilib.

Faktla bağlı Qaradağ rayon prokurorluğunda Cinayət Məcəlləsinin qəsdən adam öldürmə maddəsi ilə cinayət işi başlanılıb. Cinayəti törətməkdə təqsirli bilinən 34 yaşlı Füzuli rayon sakini Nahid Həsənov saxlanılıb.

İş üzrə dindirilən Nahid Həsənov bildirib ki, Bəhruz Məmmədovla məktəbdə bir sinifdə oxuyublar, aralarında ədavət olmayıb. 2025-ci ilin avqustun 4-də işdən evə gələndə, həyətdə oynayan oğlu Osman Bəhruzun bacısı oğlunun onu vurduğunu deyib.

Nahid həmin uşağa bir də belə şey etsə, onu cəzalandıracağını söyləyib. Uşaq da bu barədə dayısı Bəhruza deyib. Bəhruz Nahidə zəng edərək söhbət etmək üçün onu stadionun yanına çağırıb. Oraya gedəndə Bəhruz yumruqla Nahidin sinəsinə zərbə vuraraq ayağından tutub və onu yerə yıxıb. Ətrafdakı şəxslər onları ayırsa da, Bəhruz yenidən onun üzərinə gəlib. Bu zaman bıçağı çıxararaq ona zərbə endirib. Sonra hər ikisi hadisə yerindən uzaqlaşıb.

Nahid bir müddət sonra qardaşı Cahidə zəng edib, hadisə barədə məlumat verib. Qardaşı Bəhruzgilə gəlib, onun yaralı halda divanda uzandığını görüb. Bəhruz Cahidə qardaşının tutulmağını istəmədiyi üçün Təcili yardıma məlumat vermədiyini bildirib. Təxminən 2 saat sonra Cahid qardaşına zəng edərək Bəhruzun öldüyünü deyib.

Zərərçəkmiş şəxsin hüquqi varisi Aytəkin Muradova ifadəsində göstərib ki, işdən gələndə evdə həyat yoldaşını, qardaşı Bəhruzu və Nahidin qardaşı Cahidi görüb. Qardaşının bıçaqlandığını öyrənib. Cahid Bəhruza Təcili tibbi yardım çağırmasını bildirsə də, qardaşı razılaşmayıb. Bir müddətdən sonra qardaşının halı pisləşəndə, Cahidin təkidi ilə 103-ə zəng edib, məlumat veriblər. Buna baxmayaraq Bəhruzun həyatını xilas etmək mümkün olmayıb.

Məhkəmə iclasında Nahid Həsənov ittiham üzrə özünü qismən təqsirli bilib. Zərərçəkmiş şəxsin hüquqi varisi təqsirləndirilən şəxsə qarşı şikayəti olmadığını deyib.

Bakı Ağır Cinayətlər Məhkəməsinin hökmü ilə Nahid Həsənov cəzasını ciddi rejimli cəzaçəkmə müəssisəsində çəkməklə 9 il müddətinə azadlıqdan məhrum olunub.