"Qumar kralı"nın cinayət işi ilə bağlı detallar üzə çıxdı | Baş Prokurorluqdan açıqlama

İnternetdə qumar oyunlarının təşkili və digər qanunsuz hərəkətlərlə bağlı Baş prokuror yanında Korrupsiyaya qarşı Mübarizə Baş İdarəsində cinayət işi başlanıb.

Qurumdan bildirilib ki, istintaq-əməliyyat tədbirləri ilə Yusif Baqiyevin Ramil Saadov və digər şəxslərlə birləşərək özünün onlayn qumar saytları vasitəsilə külli miqdarda qanunsuz gəlir əldə etməsinə əsaslı şübhələr müəyyən edilib.

Belə ki, Yusif Baqiyev 2022-ci ildən başlayaraq “Paysis” və “Pulpal” MMC-lərin rəhbəri Samir Nasibov ilə sövdələşərək ona məxsus pulköçürmə sistemlərində ayrı-ayrı şəxslərin adına elektron pul kisələrini açmaqla onlayn qumardan əldə olunan vəsait həmin kisələrə köçürülüb. Daha sonra ümumilikdə 161 milyon manatdan artıq vəsait müxtəlif şəxslərin adlarına açılan çoxsaylı kart hesablarına köçürməklə leqallaşdırılıb.

Toplanan ilkin sübutlar əsasında Yusif Baqiyev, Ramil Saadov və Samir Nasibova Cinayət Məcəlləsinin müvafiq maddələri ilə ittiham elan edilib. Yusif Baqiyev barəsində Binəqədi Rayon Məhkəməsinin qərarı ilə həbs, Ramil Saadov və Samir Nasibovla bağlı isə polisin nəzarəti altına vermə növündə qətimkan tədbiri seçilib.