"Satıb şər atdı, dedi ki, get, nə edirsən, et!" | Şok iddialarla dolu hadisənin detalları - Baku TV

Baku TV-nin qaynar xəttinə müraciət edən vətəndaş Nurcahan Şəmsiyeva ona məxsus zirzəminin ələ keçirilməsi ilə bağlı şikayət edib.

O bildirib ki, Bakı şəhəri, Yasamal rayonu, Nizami 13 ünvanında yerləşən 64,1 kvadratmetrlik zirzəmini Telman Rüstəmov qanunsuz ələ keçirməyə çalışır.

N.Şəmsiyeva qeyd edib ki, zirzəmi 2006-cı ildən texniki pasport və çıxarışla ona təqdim olunub:

“Baldızım 2011-ci ildə qonşu ərazidəki mənə aid sahəni dələduzluq yolu ilə alqı-satqı edib. Oğlumun orada haqqı olmasına baxmayaraq, onu qeydiyyatdan siliblər. İndi mənim zirzəmimə müdaxilə olunur. Qarşı tərəfin qeyri-yaşayış sahəsi üzərində həbs var və borclara görə hərraca çıxarılmalıdır. Mənim sahəmin alınması qanunsuzdur”.

Zirzəmiyə yiyələnməyə çalışdığı iddia olunan Telman Rüstəmov isə deyib:

“Eyni sənədlərdən məndə də var. 2024-cü ildə yerimi tələb edəndə şər atmağa başladılar. Biz də dövlət məhkəməsinə müraciət etdik. Mən oranı 2007-ci ildə 35 min dollara almışam”.

Qeyd edək ki, məsələ müvafiq məhkəmə orqanlarında araşdırılır.