"Şokdayıq, belə şey olmamışdı" | Əmioğluları kim öldürdü? | Duelə çağırıb, çatan kimi..." - Baku TV

Ağcabədi rayonunun Yuxarı Qiyaməddinli kəndində qətl hadisəsi baş verib.

22 yaşlı Əliniyaz Əliyevin 30 yaşlı Şaiq Mamedov və onun əmisi oğlu, 37 yaşlı Həsən Mamedovu öldürdüyü bildirilir.

Mərhumun qohumu Pöhrüz İsmayılovun sözlərinə görə, hadisə toy mərasimindən sonra baş verib:

“Toydan gələn Əliniyaz yolda Şaiq adlı gənci və Həsəni mübahisəyə çağırıb. Daha sonra bıçaqla əvvəlcə Şaiqi qarın nahiyəsindən vurub. Həsən onu xilas etmək istəyərkən arxadan zərbə alıb. Hadisəni törədən şəxs daha sonra ətrafdakılara hədə-qorxu gəlib”.

Digər qohum İmran Daşdəmirov isə bildirib ki, hadisəni törədən şəxs əvvəlcə Şaiqi çağıraraq ona hücum edib:

“Şaiq hadisə yerinə çatan kimi bıçaqlanıb. Həsən dostunu götürmək istəyəndə o da kürəyindən zərbə alıb. Həsən hadisə yerində dünyasını dəyişib, Şaiq isə xəstəxanaya aparılarkən yolda vəfat edib”.

Məlumata görə, 12 ildir evli olan Şaiq Mamedovun övladı olmayıb və onun yaxın günlərdə ata olacağı bildirilir.

Ağcabədi rayon prokurorluğundan verilən məlumata əsasən, faktla bağlı Cinayət Məcəlləsinin 120.2.7-ci (iki və ya daha çox şəxsin qəsdən öldürülməsi) maddəsi ilə cinayət işi başlanıb. Əliniyaz Əliyev şübhəli şəxs qismində tutulub. Hazırda ibtidai istintaq davam etdirilir.