Qusarda 29 yaşlı qadın doğuşdan sonra komaya düşdü
Qusarda 29 yaşlı qadın doğuşdan sonra komaya düşüb. Doğmaları gənc ananın bu vəziyyətə düşməsində həkim səhlənkarlığı olduğunu iddia edirlər.
Quba rayonunun Digah kənd sakini 29 yaşlı Aygün Nemətova 2-ci övladını dünyaya gətirmək üçün Qusar Rayon Mərkəzi Xəstəxanasına gətirilib. Yanvarın 23-də qeysəriyyə yolu ilə onun 2-ci övladı dünayaya gəlib. Övladına qovuşan ana və onun doğmalarının sevinci isə qısa çəkib. Bir gün sonra Aygün Nemətovanın qəfil halı pisləşib və komaya düşüb.
Xəstənin yaxınları iddia edirlər ki, Aygünə sonradan vurulan iynə onun vəziyyətini daha da ağırlaşdırıb. Artıq 18 gündür ki, xəstə komada ağır vəziyyətdədir və səhhətində heç bir irəliləyiş yoxdur.
Aygünün həyat yoldaşı doğuş üçün həkimə 500 manat pul verdiyini, lakin həkimin məsuliyyətsiz davrandığını deyir.