Residivist saxta sənədlər hazırlamaqda ittiham olunur

Məhkəmələrin adından saxta sənədlər hazırlayan şəxs saxlanılıb.  Bu barədə Dövlət Təhlükəsizliyi Xidməti və Məhkəmə-Hüquq Şurası birgə məlumat yayıb.

Bildirilib ki, vətəndaşlardan biri şuraya müraciət edərək Zöhrab Paşayev adlı şəxsin məhkəmə işləri ilə bağlı ona yardım edəcəyini və bunun müqabilində həmin şəxsdən külli miqdarda pul aldığını bildirib. Zöhrab Paşayev aldığı məbləğə görə vətəndaşa Bakı Apellyasiya Məhkəməsi və Məhkəmə Huquq Şurası adından müxtəlif məktublar təqdim etməli imiş.

Bununla bağlı Dövlət Təhlükəsizlik Xidmətində aparılan araşdırmalar zamanı əvvəllər Cinayət Məcəlləsinin dələduzluq, özbaşına özünü vəzifəli şəxs kimi təqdim etmə, rəsmi sənədləri qanunsuz hazırlama maddələri ilə məhkum edilən və məhkumluğu ödənilməmiş Zöhrab Paşayev barəsində əsaslı şübhələr müəyyən edilib. O, cinayət məsuliyyətinə cəlb olunub.

Vətəndaşlara tövsiyə edilir ki, hüquqi yardımın göstərilməsi ilə bağlı yalnız qanunvericiliklə müəyyən olunan qaydada həmin fəaliyyətlə peşəkar qaydada məşğul olan şəxslərə və ya qurumlara müraciət etsinlər.