Sabiq direktor müavini hakim qarşısına çıxarıldı | Natiq Mehdinin qətli ilə bağlı dəhşət

2024-cü il mayın 14-də Bakının Xətai rayonunda yerləşən 55 nömrəli məktəbin mühafizəçisi Natiq Mehdini qətlə yetirməkdə təqsirləndirilən Elsəvər İslamovun cinayət işi üzrə məhkəmənin ilk baxış iclası keçirilib.

Bakı Ağır Cinayətlər Məhkəməsinin hakimi Elmin Rüstəmovun sədrliyi ilə keçirilən prosesdə ilkin olaraq ötən hazırlıq iclasında dəqiqləşdirilməmiş müəyyən anket məlumatlarına aydınlıq gətirilib.

Zərərçəkən Natiq Mehdinin bacısı Yeganə Mehdi onun hüquqi varisi kimi məhkəmədə iştirak edib. Sonra isə prokuror Ziya Mansurov ittiham aktını elan edib.

İttiham olunduğu maddələrə görə, Elsevər İslamovun 15 ildən 20 ilədək və yaxud ömürlük azadlıqdan məhrum edilə biləcəyi ilə bağlı hakim onu məlumatlandıraraq, özünü təqsirli bilib-bilmədiyini soruşub. Elsevər İslamov isə törətməkdə şübhəli olduğu cinayətə görə qismən özünü təqsirli bilib.

İttihama görə, Elsevər İslamov Natiq Mehdinin iş yerində yatmağını ona irad bildirib. Buna görə aralarında mübahisə yaranıb. Mübahisə zamanı Elsevər İslamov yumruq və təpik zərbələri ilə onu yerə yıxaraq daha sonra mətbəx bıçağı ilə bədəninin müxtəlif nahiyələrinə çoxsaylı zərbələr endirib. Aldığı xəsarətlərdən dünyasını dəyişən Natiq Mehdinin meyitinin üzərində təhqiredici hərəkətlər edərək onun qol, ayaq, baş və hətta cinsiyyət orqanını kəsərək meyiti hissələrə ayırıb. O, hissələri sellofan torbalara yıqaraq “Pajero” markalı avtomobili ilə Xəzər rayonunun ərazisinə aparaq orada basdırıb.

Məhkəmə prosesi 3 oktyabr tarixinə kimi təxirə salınıb.