Sabunçuda 2 illik qətlin detalları məlum oldu

2021-ci il noyabrın 29-u saat 20-də 3 saylı şəhər klinik xəstəxanasında 59 yaşlı Məhəmməd Əliyevin ölməsi barədə Sabunçu Rayon Polis İdarəsinin 15-ci Polis Bölməsinə məlumat daxil olub.

Məhkəmə-tibbi ekspertizasının rəyinə görə, onun ölümünə aldığı xəsarətlər nəticəsində beyinə qansızma səbəb olub.

Noyabrın 30-da faktla bağlı 57 yaşlı Bakı şəhər sakini Rəhman Əzimov saxlanılıb. Hadisə ilə bağlı Sabunçu Rayon Prokurorluğunda Cinayət Məcəlləsinin qəsdən sağlamlığa ağır zərər vurma, ehtiyatsızlıqdan zərərçəkmiş şəxsin ölümünə səbəb olduqda maddəsi ilə cinayət işi başlanılıb.

İstintaqla müəyyən edilib ki, noyabrın 27-i aralarında yaranan mübahisə zamanı Rəhman Məhəmmədin üzünə yumruqla zərbə vurub. Arxası üstə yerə yıxılan Məhəmmədin qarın nahiyyəsinə də təpkilə 2 dəfə zərbə endirib. Rövşən Nəzərəliyev müdaxilə edib Məhəmmədi yerdən qaldırarkən isə Rəhman yenidən yaxınlaşıb, təpiklə onun başına ağır xəsartərlər yetirib.

Hadisə yerində olan şəxslər zərərçəkmişi 3 saylı Şəhər Klinik Xəstəxanasına çatdırıblar. Müvafiq tibbi yardım göstərilməsinə baxmayaraq, Məhəmməd Əliyev noyabrın 29-da xəstəxanada ölüb.

İş üzrə dindirilən Rəhman Əzimov bildirib ki, Məhəmmədin həmin zərbələrin təsirindən öləcəyinə inanmayıb. Onun bir neçə dəqiqədən sonra ayılacağını düşünüb və həmin ərazini tərk edərək evə gedib. Rəhman onu da qeyd edib, həmin vaxt içkili olmasaydı, bu hadisə baş verməzdi.

Məhkəmə iclasında ittiham üzrə özünü qismən təqsirli bilərək ona yüngül cəza təyin edilməsini xahiş edib. Məhəmməd Əliyevin oğlu isə Əzimova ağır cəza verilməsini istəyib.

Bakı Ağır Cinayətlər Məhkəməsinin hökmü ilə Rəhman Əzimov 9 il 6 ay müddətinə azadlıqdan məhrum olunub.