Sabunçudakı qandonduran qətlin təfərrüatı | Qatil hakim qarşısında

Bakının Sabunçu rayonunda həyat yoldaşını qətlə yetirməkdə ittiham olunan 1997-ci il təvəllüdlü Bəxtiyar Vəliyevin cinayət işi üzrə ilk məhkəmə hazırlıq iclası keçirilib.

Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Dövlət ittihamçısı Fuad Musayev cinayət işinin ibtidai istintaqı zamanı təqsirləndirilənə qarşı irəli sürülən ittihamın tam sübuta yetirilməsini əsas gətirərək işin məhkəmə araşdırması mərhələsinə verilməsini təklif edib. Qısa müşavirədən sonra cinayət işi məhkəmə baxışına verilərək növbəti iclas dekabrın 11-nə təyin edilib.

Qeyd edək ki, hadisə ilə bağlı 2024-cü il avqustun 17-də Sabunçu rayonu ərazisində 1999-cu il təvəllüdlü Xumar Həsənlinin aldığı xəsarətlərdən xəstəxanada ölməsi barədə rayon prokurorluğuna məlumat daxil olub.

Araşdırmalarla 1997-ci il təvəllüdlü Bəxtiyar Vəliyevin rayon ərazisində yaşadıqları fərdi yaşayış evində arvadı Xumar Həsənliyə kəsici-deşici alətlə xəsarətlər yetirməsi nəticəsində sonuncunun müalicə olunduğu xəstəxanada ölməsinə dair əsaslı şübhələr müəyyən edilib.

Araşdırmalar zamanı hadisənin qısqanclıq zəminində baş verdiyi məlum olub. İstintaq orqanı tərəfindən Bəxtiyar Vəliyev barəsində Cinayət Məcəlləsinin xüsusi amansızlıqla və ya təhlükəli üsulla adam öldürmə maddəsi ilə ittiham elan olunub.