Şəmkirdə baş verən qətlin yeni detalları məlum oldu - CANLI

Şəmkir rayonunun Şiştəpə kəndində baş verən dəhşətli ailə faciəsinin yeni və şok təfərrüatları məlum olub. Rayon sakini, 1971-ci il təvəllüdlü Arif Hacıyev boşanmaq üstündə yaranmış uzunmüddətli münaqişə zəminində həyat yoldaşı Röyalə Hacıyevanı (1985-ci il təvəllüdlü) amansızlıqla qətlə yetirib. Hadisə Şiştəpə kəndində yerləşən məscidin yaxınlığında qeydə alınıb. İlkin məlumata görə, mübahisə zamanı Arif Hacıyev arvadının boğazını kəsərək onun ölümünə səbəb olub. Ailədaxili münaqişənin səbəbləri araşdırılarkən qətli törədən şəxsin qohumları tərəfindən mərhumənin xəyanət iddiaları irəli sürülüb. Faciəvi hadisənin ən acı nəticələrindən biri də cütlüyün azyaşlı oğlunun atasına mane olmaq istəyərkən bıçaq zərbələri ilə xəsarət almasıdır. Xəsarət alan 2009-cu il təvəllüdlü yeniyetməyə ilkin tibbi yardım göstərildikdən sonra evə buraxılıb. Cinayət hadisəsini törətməkdə şübhəli bilinən Arif Hacıyev dərhal polis tərəfindən saxlanılıb.