Sərnişinin hərəkəti metronun bu stansiyasında insanları qorxuya saldı

Yanvarın 3-ü saat 19:25-də metronun “Xətai” stansiyasında sərnişinlərdən biri eskalatorun “Stop” açarını sıxıb, nəticədə pilləkən dayanıb. Bu səbəbdən də sərnişinlərin hərəkət intensivliyində sıxlıq yaranıb.

Bu barədə "Bakı Metropoliteni"nin yaydığı məlumatda deyilir.

Bildirilir ki, eskalatorun dayanması səbəbini müəyyən etmək məqsədilə dərhal idarəetmə panelinə baxış keçirilib:

“Nəticədə texniki problem olmadığı, dayanmanın “Stop” açarının sıxılması səbəbindən baş verdiyi aşkarlanıb. Daha sonra eskalatorun fəaliyyəti bərpa olunub. Qeyd edilməlidir ki, “Stop” açarı fövqəladə hallarda, təcili və təxirəsalınmaz zərurət olduqda pilləkənin dayandırılmasını təmin edir”.

“Hadisə ilə bağlı müvafiq araşdırmaların aparılması və tədbirlərin görülməsi üçün “Bakı Metropoliteni”ndə Polis İdarəsinə müraciət edilib. Xatırladırıq ki, “Stop” düyməsinin əsassız sıxılması İnzibati Xətalar Məcəlləsinin 306.4-cü maddəsinə uyğun olaraq məsuliyyət yaradır. Bir sərnişinin yanlışlığı onun özünün, eləcə də ətrafında olan digər sərnişinlərin narahatlığını, xəsarət almasını və digər bədbəxt hadisələrin baş verməsini qaçılmaz edə bilər”, – deyə qurumun mətbuat xidmətindən bildirilib.