Sevgilisinin qatilinə çevrilən qadına hökm oxundu | Bakıda dəhşətli cinayət

Bakıda özündən 10 yaş kiçik sevgilisini qətlə yetirməkdə təqsirləndirilən Ruhiyyə Tahirovanın cinayət işi üzrə məhkəməsinin yekun prosesi keçirilib.

Bakı Ağır Cinayətlər Məhkəməsində hakim Kamran Muxtarovun sədrliyi ilə baş tutan prosesdə hökm oxunub. Məhkəmənin hökmü ilə Ruhiyyə Tahirova 10 il müddətində azadlıqdan məhrum edilib.

Xatırladaq ki, dövlət ittihamçısı təqsirləndirilən Ruhiyyə Tahirovanın 12 il 6 ay müddətində azadlıqdan məhrum edilməsini istəyib.

Qeyd edək ki, hadisə ötən il mayın 30-da paytaxtın Sabunçu rayonu ərazisində baş verib. 1986-cı il təvəllüdlü Samir İsrəfilovun kəsilmiş-deşilmiş xəsarətlərdən ölməsi barədə Sabunçu Rayon Prokurorluğuna məlumat daxil olub. Araşdırma zamanı 1976-cı il təvəllüdlü Ruhiyyə Tahirovanın aralarında yaranan mübahisə zamanı qeyri-rəsmi münasibətdə olduğu Samir İsrəfilova bıçaqla xəsarət yetirərək qəsdən öldürməsinə əsaslı şübhələr müəyyən edilib.

Faktla bağlı Sabunçu Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.