Sifətinə silinməz iz salmaq istədim | Məhkum hadisənin səbəbini etiraf etdi

Cəzaçəkmə müəssisəsində öz məhkum yoldaşını öldürməyə cəhddə təqsirləndirilən Azər Şalıyevin növbəti məhkəmə prosesi keçirilib.

Bakı Ağır Cinayətlər Məhkəməsinin hakimi Faiq Qəniyevin sədrliyi ilə keçirilən prosesdə prokuror Babaxan Həsənəliyev təqsirləndirilən şəxsə ittiham aktını elan edib. Bundan sonra məhkum yoldaşını öldürməyə cəhd edən Azər Şalıyevin ifadəsi dinlənilib.

Hazırda Penitensiar Xidmətin 13 saylı cəzaçəkmə müəssisəsində məhbus olan Azər Şalıyev məhkum yoldaşı zərərçəkən Şəhriyar Baxşəliyevlə hər-hansı bir ədavətinin olmadığını vurğulayıb. Şəhriyara xəsarət yetirməsinin səbəbini onun şəxsi telefon nömrələri qeyd olunan kitabçasına baxması ilə əsaslandırıb.

Bu cür hallar məhkumlar arasında nalayiq hərəkət kimi qiymətləndirildiyindən o, Şəhriyarın sifətinə silinməz iz salmaq məqsədilə ona ülgüclə xəsarət yetirməyi planlaşdırıb. Bu məqsədlə də Azər məhkum yataqxanasında əşyaların saxlanc yerində Şəhriyara qəfil hucum edərək onun sifətini ülgüclə kəsmək istəyib. Nəticədə zərərçəkənin boyun arteriya damarı kəsilib və o, təcili tibb məntəqəsinə çatdırıldığından onun həyatını xilas etmək mümkün olub.

Zərərçəkən Şəhriyar Baxşəliyev isə ifadəsi zamanı bildirib ki, onun oxuyub-yazmaq savadı yoxdur və hər-hansı bir kitabçaya baxmaq ittihamı ona qarşı olan iftiradır. Zərərçəkən bütün bunlara baxmayaraq, ona xəsarət yetirən məhkum yoldaşından şikayətçi olmadığını deyərək onu bağışladığını bildirib.

Qeyd edək ki, hər iki şəxs Cinayət Məcəlləsinin qəsdən adam öldürmə maddəsi ilə həbsdədir. Təqsirləndirilən Azər Şalıyevin cəzasının bitməsinə 1 il 7 ay, zərərçəkmiş Şəhriyar Baxışəliyevin isə 3 ilə yaxın müddət qalıb.

Azər Şalıyevə qarşı Cinayət Məcəlləsinin xuliqanlıq niyyəti ilə qəsdən adam öldürməyə cəhd maddəsi ilə ittiham irəli sürülüb.