SOCAR-ın texniki vasitələri axtarışlara cəlb edildi | Kürdə batanlarla bağlı yeni xəbər

2024-cü il iyunun 2-də Tovuz rayonunun Hunanlar kəndi ərazisində içərisində 3 nəfərin olduğu avtomobil Kür çayına düşüb.

Fövqəladə Hallar Nazirliyinin Xüsusi Riskli Xilasetmə Xidməti, Kiçikhəcmli Gəmilərə Nəzarət və Sularda Xilasetmə Dövlət Xidməti, həmçinin Gəncə Regional Mərkəzinin qüvvələri tərəfindən axtarışlara başlanılıb.

Bu barədə FHN-in Mətbuat Xidmətindən bildirilib.

Axtarışlar nəticəsində 2024-cü ilin iyunun 9-da batan 3 nəfərdən biri – 1992-ci il təvəllüdlü Cəfərov Vüqar Rəsul oğlunun meyiti dalğıclar tərəfindən tapılaraq aidiyyəti üzrə təhvil verilib. Digər iki nəfər – 1988-ci il təvəllüdlü Sadıqov Elxan Sakit oğlu və 1989-cu il təvəllüdlü Quliyev Tural Hüseyn oğlunun axtarışları davam edir.

Son həftələr ərzində yağan intensiv yağışlar nəticəsində Kür çayında suyun səviyyəsi və axının sürətinin xeyli artması, sualtı görüntü məhdudiyyəti nəzərə alınaraq batdığı ehtimal olunan şəxslərin axtarışlarına SOCAR-ın Geofizika və geologiya idarəsinin xüsusi texniki vasitələri cəlb olunmaqla axtarış işləri davam etdirilir.