Söz vermişdilər ki, 2 günə ayağa qalxacaq... | Lənkəranda kişinin müəmmalı ölümü

Lənkəran Rayon Mərkəzi Xəstəxanasında ölüm faktı qeydə alınıb.

Lənkəran şəhər sakini, 54 yaşlı Mübariz Şərifov ürəyində yaranan problemə görə xəstəxanaya müraciət edib.

Mərhumun oğlunun sözlərinə görə, o, əməliyyat prosesində həyatını itirib:

“Hansı səbəbdən ölməsi barədə bizə məlumat verilmir. Atamda heç bir problem yox idi, sadəcə müayinəyə gətirmişdik. Ürəyində problem var idi. Dedilər ki, infarkt keçirə bilər, əməliyyat edilməlidir, təcilidir. Əməliyyatdan sonra 2 günə ayağa qalxacaq dedilər, bizə belə söz vermişdilər”.

“Rəhmətlik sağlam şəkildə xəstəxanaya gəlmişdi. Heç bir problem də olmayıb, hər şey qaydasında idi. Sonradan xəbər verdilər ki, dünyasını dəyişib. Səbəbini soruşanda dedilər ki, ürək fəaliyyətini dayandırıb”, – deyə mərhumun qohumu bildirib.

Meyit müayinə olunması üçün Məhkəmə-Tibbi Ekspertiza və Patoloji Anatomiya Birliyinin Lənkəran rayon şöbəsinə təhvil verilib. Ölümün dəqiq səbəbləri ekspertizanın verəcəyi rəydən sonra məlum olacaq.

Faktla bağlı Lənkəran rayon prokurorluğunda araşdırma aparılır.