Sükan arxasında yuxuladı, avtomobil digər maşına və köşkə çırpıldı

Nərimanov rayonunda 2 avtomobilin iştirakı ilə yol-nəqliyyat hadisəsi baş verib.

Qəza Ə.Rəcəbli və Təbriz küçələrinin kəsişməsində, metronun “Nəriman Nərimanov” stansiyasının yaxınlığında qeydə alınıb.

Turabov Altay Zəlimxan oğlu idarə etdiyi “Toyota” markalı avtomobillə Ə.Rəcəbli küçəsində yüksək sürətlə hərəkətdə olarkən anidən yuxulayıb.

Bu zaman avtomobil Təbriz küçəsində hərəkətsiz vəziyyətdə dayanan və taksi fəaliyyəti ilə məşğul olan Asiman adlı sürücüyə məxsus “Daewoo Gentra” markalı nəqliyyat vasitəsinə, daha sonra işıqfora və səkidə fəaliyyət göstərən köşkə çırpılıb.

Qəza zamanı "Toyota" markalı avtomobildə olan sərnişin, 1990-cı il təvəllüdlü Turabov Şükür Zəlimxan oğlu xəsarət alaraq xəstəxanaya yerləşdirilib. Ona döş qəfəsinin küt travması diaqnozu qoyulub.

Hadisə zamanı işıqfor qırılıb, köşkə və yol infrastrukturuna ciddi ziyan dəyib, avtomobillər isə deformasiyaya uğrayıb.

Qəza nəticəsində avtomobillərin benzin çəninə zədə dəydiyindən nəqliyyat vasitələrinin benzini yola axıb.

Əraziyə Nərimanov Rayon Polis İdarəsinin və DYP əməkdaşları, eləcə də FHN-in Yanğından Mühafizə Xidmətinin briqadası cəlb edilib.

Faktla bağlı araşdırma aparılır.

Kamil Əmirli
Elşad Mətləboğlu